Қазақстан Республикасы Президенті Іс басқармасының «Қазақстан Республикасы Президентінің Әкімшілігі мен Үкіметінің әкімшілік ғимараттары дирекциясы» РМК-да және «Жұмысшы кәсіптер жылы» шеңберінде мінсіз жұмыс өтілі бар жұмыскерлердің жетістіктерін жариялау тақырыбын жалғастыра отырып, біздің жұмыскеріміз Серік Сансызбайұлы Кәрімов туралы айтқымыз келеді. Кәсіпорында 2007 жылғы 22 мамырдан бастап көлік қызметінде жүк-жолаушы көлігінің жүргізушісі болып жұмыс істейді. Көлікті жүргізу саласында мол тәжірибесі бар. Жалпы жұмыс өтілі - 32 жыл.
Серік Сансызбайұлы жұмыс барысында өзін адал, жауапты, жауапкершілігі мол жұмыскер ретінде көрсете білді. Жас жұмыскерлерге тәлімгер болып, өзінің мол тәжірибесімен бөлісіп жүр. Көпшіл, адамдармен тез тіл табысады. Ұжым ортасында құрметке ие. 3 баланы тәрбиелеп өсірді. Үлкен қызына немерелерді тәрбиелеуге көмектеседі.
Көп жылғы мінсіз еңбегі үшін және Көлік қызметкерлерінің күніне орай Қазақстан Республикасы Индустрия және инфрақұрылымдық даму министрлігі атынан, 2021 жылғы 19 шілдедегі № 578 – К бұйрығымен «Құрметті автокөлікші» төсбелгісімен марапатталды. Бірнеше рет Кәсіпорын атынан Құрмет грамоталарымен марапатталды.
- «Менің жұмысым маған ұнайды. Әр күн - бұл жаңа жауапкершілік және жаңа тапсырма. Жүргізушінің жұмысы тек көлікті басқару дағдылары ғана емес сонымен қатар адамдармен қарым-қатынас жасауды да қажет етеді. Біз жай ғана көлік жүргізіп қоймаймыз, жұмысшыларымызға тасымалдау арқылы жайлылық жасаймыз, олардың қауіпсіздігін қамтамасыз етеміз».
