ҚР Президентінің Іс басқармасы жүйесінде Ұлыстың ұлы күніне орай ұлттық спортымыз – тоғызқұмалақтан жарыс өтті.
Жыл сайынғы дәстүрлі спартакиаданың кезеңдік бөлігі саналатын сайыстың ашылу салтанатында ҚР Президенті Іс басқармасы бас тәлімгерлер кеңесінің төрағасы Серік Сыдықов сөз сөйледі.
-Келіп жеткен Наурыз тойы құтты болсын! Президент Іс басқармасындағы игі дәстүр жалғасын тауып келеді. Өткенде шаңғы жарысы өтсе, бүгін тоғызқұмалақ турнирі ұйымдастырылып отыр. Спортты насихаттау – ұлт саулығының кепілі. Осындай іс-шаралар қызметкерлердің шеберлігін шыңдап қана қоймай, ұжымдағы ауызбірлікті, корпоративтік рухты нығайтады. Барлық қатысушыларға табыс тілеймін,- деді ол.
Наурыз тойына аясындағы сайысқа Іс басқармасына қарасты кәсіпорындардан 15 команда қатысты. Атап айтқанда, орталық аппарат, Медициналық орталық, «Қарлығаш» балабақшасы, Медициналық технологиялар және ақпараттық жүйелер орталығы, МТҚБ Әкімшілік ғимараттар дирекциясы, МТҚБ Автошаруашылығы, МТҚБ Инженерлік орталығы, Президенттік орталық, Мемлекеттік резиденциялар дирекциясы, ҚР Президентінің Әкімшілігі мен Үкіметі Әкімшілік ғимараттары дирекциясы, Автошаруашылық, «Бүркіт» авикомпаниясы, Инженерлік-техникалық орталық, «Қазқұрылысжүйесі» кәсіпорынды, «Бурабай» ұлттық паркі сынды іргелі ұжымдардың әрқайсысы 2 ойыншыдан жұптап қатыстырды.
Қатысушылар швейцариялық жүйе бойынша өтті. Команда мүшелерінің әрқайсысы 5 партияда сынға түсті.
Біздің Кәсіпорын атынан шыққан "Қаржы министрлігі" жабдықтарын пайдалану қызметінің қызметкері Елжас Жүсіп және электротехникалық қызметінің қызметкері Меруерт Бекішева жүлделі үшінші орынға қол жеткізді.
Жеңімпаздар мен жүлдегерлерге арнайы кубоктар мен дипломдар табысталды. Салауатты өмір салтын насихаттауға бағытталған спартакиада жыл соңына дейін жалғасады. Алдағы уақытта шағын футбол, волейбол, шахмат, қазақ күресі және басқа да спорт түрлерінен сайыстар өтеді.
