«AMANAT» партиясының «Бірлік» филиалы мен Қазақстан Республикасы Президенті Іс басқармасының «Қазақстан Республикасы Президентінің Әкімшілігі мен Үкіметінің әкімшілік ғимараттары дирекциясы» ШЖҚ РМК бірлесіп Жұмысшы мамандықтар жылының қорытындыларын шығару және әкімшілік ғимараттардың үздіксіз жұмысын қамтамасыз етіп жүрген еңбеккерлерді марапаттау мақсатында салтанатты іс-шара өткізді.
Құрметті қонақтар қатарында кәсіпорын директоры Талғат Өскенұлы Мүслімов, «Бірлік» филиалының атқарушы хатшысы Есенбек Салдарбекұлы Серкебаев, сондай-ақ партия өкілдері мен филиалдың белсенді мүшелері болды.
Іс-шара барысында жұмысшы мамандықтарының мемлекеттік нысандардың тұрақты қызметін қамтамасыз етудегі маңызды рөлі атап өтіліп, еңбек ұжымдарының сенімділік пен сапаның негізгі тірегі екені ерекше айтылды. Басшылық еңбеккерлерге кәсібилігі, жауапкершілігі және өз ісіне адалдығы үшін алғысын білдірді.
Бағдарламаның негізгі бөлігі – марапаттау рәсімі болды. Жоғары кәсібилік пен адал еңбегі үшін бірқатар еңбеккерлер Алғыс хаттармен марапатталды. Марапаттарды кәсіпорын директоры Талғат Өскенұлы Мүслімов табыстады.
Іс-шара жылы лебіздермен және еңбеккерлерге табыс тілеумен аяқталды. Ұйымдастырушылар мұндай кездесулер корпоративтік мәдениетті нығайтуға және жұмыскерлердің ынтасын арттыруға ықпал ететінін атап өтті.
